នៅក្នុងឆ្នាំ ២០២៥ និន្នាការធ្វើដំណើរត្រូវបានកំណត់ថានឹងងាកទៅរកនិរន្តរភាពកាន់តែខ្លាំងជាងពេលណាៗទាំងអស់ ជាមួយនឹងកន្លែងស្នាក់នៅដែលមិនប៉ះពាល់ដល់បរិស្ថាន និងកម្មវិធីទូទាត់កាបូនដែលកំពុងទទួលបានការពេញនិយមយ៉ាងខ្លាំង។ Euronews ដែលជាបណ្តាញព័ត៌មានទូរទស្សន៍ទូទាំងអឺរ៉ុប មានទីស្នាក់ការកណ្តាលនៅទីក្រុងលីយ៉ុង ប្រទេសបារាំង បានបោះពុម្ភផ្សាយរបាយការណ៍និន្នាការធ្វើដំណើរឆ្នាំ ២០២៥ កំណែ “ការរុករកបែបប្លែក ការធ្វើដំណើរកាន់តែប្រសើរ”។

របាយការណ៍បានបង្ហាញថា ទោះបីជាមានការកើនឡើងនៃថ្លៃជីវភាពរស់នៅ និងសម្ពាធអតិផរណាក៏ដោយ ក៏ការធ្វើដំណើរនៅតែជាអាទិភាពចម្បងសម្រាប់អ្នកប្រើប្រាស់ជាច្រើន។ ទន្ទឹមនឹងការងើបឡើងវិញយ៉ាងរឹងមាំក្រោយការរីករាលដាលនៃជំងឺកូវីដ១៩ ពិភពលោកកំពុងផ្តោតលើការកែប្រែទម្រង់នៃការធ្វើដំណើរឆ្ពោះទៅរកអ្វីដែលប្រសើរជាងមុនសម្រាប់មនុស្សជាតិ និងភពផែនដី។ ជាមួយនឹងការផ្លាស់ប្តូរនិន្នាការ និងបំណងប្រាថ្នារបស់អ្នកប្រើប្រាស់ ឧស្សាហកម្មទេសចរណ៍សកលអាចនឹងឈានទៅរកគំរូដែលផ្តល់អាទិភាពដល់បរិស្ថាន សហគមន៍ និងការធ្វើសមាហរណកម្មបច្ចេកវិទ្យា ដោយទាញយកផលប្រយោជន៍ពីតម្លៃរបស់ភ្ញៀវទេសចរដែលកំពុងវិវត្ត។

ការធ្វើដំណើរក្នុងឆ្នាំ ២០២៥ នឹងជាឆ្នាំនៃនិន្នាការធ្វើដំណើរដែលមានគោលបំណងច្បាស់លាស់ជាងមុន។ ភ្ញៀវទេសចរលែងជាអ្នកប្រើប្រាស់អសកម្មទៀតហើយ ប៉ុន្តែជាអ្នកចូលរួមយ៉ាងសកម្ម ដោយរួមចំណែកកែប្រែទីកន្លែងដែលពួកគេទៅទស្សនា តាមរយៈគំនិតផ្តួចផ្តើមនានា ដូចជាគម្រោងអភិរក្ស កម្មវិធីសហគមន៍ ឬការផ្លាស់ប្តូរវប្បធម៌។

“ផលិតផលទេសចរណ៍ដែលមានធាតុផ្សំចីរភាពរឹងមាំ ដូចជាធម្មជាតិ ជនបទ ម្ហូបអាហារ និងសុខុមាលភាព បានក្លាយជាជម្រើសធ្វើដំណើរដ៏ពេញនិយម។”, នេះជាការសង្កត់ធ្ងន់របស់លោក Zurab Pololikashvili, អគ្គលេខាធិការ UN Tourism។

ដើម្បីដោះស្រាយឱ្យកាន់តែប្រសើរឡើងនូវបម្រែបម្រួលអាកាសធាតុ និងការតវ៉ាប្រឆាំងនឹងទេសចរណ៍ទ្រង់ទ្រាយធំដែលកំពុងផ្លាស់ប្តូរទិដ្ឋភាពនៃការធ្វើដំណើរ គោលដៅទេសចរណ៍នានាគួរតែពិចារណាអំពីរបៀបឆ្លើយតបទៅនឹងតម្រូវការដែលកំពុងកើនឡើងរបស់អ្នកប្រើប្រាស់សម្រាប់ការធ្វើដំណើរដែលមានគោលបំណង ចីរភាព និងការគិតគូរបានដិតដល់ជាងមុន។

នៅពេលដែលឧស្សាកម្មនេះវិវត្តទៅមុខ គោលដៅទេសចរណ៍នានានឹងត្រូវសម្របខ្លួន និងស្វែងរកវិធីសាស្ត្រថ្មីៗ ដើម្បីជំរុញគំរូទេសចរណ៍ប្រកបដោយចីរភាព និងការស្តារឡើងវិញកាន់តែប្រសើរ។

“ប្រជាជនជំនាន់ក្រោយក៏នឹងមិនពិចារណាធ្វើដំណើរទៅកាន់គោលដៅទេសចរណ៍ណាមួយឡើយ ប្រសិនបើវា “បំផ្លាញអាកាសធាតុ ឬមិនមានធាតុផ្សំនៃការស្តារឡើងវិញ និងការទទួលខុសត្រូវ”។”, នេះជាការលើកឡើងរបស់លោក Eduardo Santander នាយកប្រតិបត្តិនៃគណៈកម្មការទេសចរណ៍អឺរ៉ុប។

និន្នាការធ្វើដំណើរទាំង ៧ ក្នុងឆ្នាំ ២០២៥

យោងតាមរបាយការណ៍ ឆ្នាំ ២០២៥ នឹងជាឆ្នាំនៃនិន្នាការធ្វើដំណើរទាំង ៧ រួមមាន៖

រូបថត៖ Luk Ban La

• ជម្រើសប្លែកៗដែលមិនសូវមានគេស្គាល់៖ ការស្វែងរកភាពអស្ចារ្យដែលលាក់កំបាំង។ អ្នកធ្វើដំណើរមាននិន្នាការជៀសវាងគោលដៅទេសចរណ៍ដែលមានមនុស្សច្រើនកុះករ ហើយបែរមកជ្រើសរើសជម្រើសដែលមិនសូវមានគេស្គាល់ និងមានតម្លៃសមរម្យជាង ប៉ុន្តែផ្តល់នូវបទពិសោធន៍ស្រដៀងគ្នា។ ការស្ទង់មតិថ្មីៗស្តីពីស្ថានភាពនៃការធ្វើដំណើរឆ្នាំ ២០២៤ (State of Travel 2024) ដោយ Thrillist បានរកឃើញថា ៦៨% នៃអ្នកឆ្លើយសំណួរក្នុងជំនាន់ Gen Z ផ្តល់អាទិភាពដល់ការស្វែងរកគោលដៅទេសចរណ៍ដែលពួកគេអាច “ស្វែងរកអ្វីដែលថ្មី” ជាជាងការទៅទស្សនាកន្លែងល្បីៗដែលត្រូវបានចែករំលែកយ៉ាងទូលំទូលាយនៅលើអ៊ីនធឺណិតរួចទៅហើយ។

• ការផ្សងព្រេងតាមខ្សែភាពយន្ត៖ ការដើរកាត់ទិដ្ឋភាពដ៏ល្បីល្បាញ។ ជាមួយនឹងគោលដៅទេសចរណ៍នៃខ្សែភាពយន្តល្បីៗដែលជួយជំរុញកំណើនទេសចរណ៍។ និន្នាការ Set Jetting បំផុសគំនិតទេសចរណ៍តម្រង់ទៅរកទីតាំងថតខ្សែភាពយន្តល្បីៗ។ យោងតាមការស្ទង់មតិឆ្នាំ ២០២៤ របស់ Expedia ៥៣% នៃអ្នកធ្វើដំណើរបានស្វែងរកព័ត៌មាន ឬកក់ការធ្វើដំណើរទៅកាន់គោលដៅទេសចរណ៍ណាមួយ បន្ទាប់ពីបានឃើញវានៅលើកញ្ចក់អេក្រង់។

• តារាងធ្វើដំណើរឌីជីថល៖ ការរុករកអនាគតបច្ចេកវិទ្យាខ្ពស់នៃការធ្វើដំណើរ។ នៅពេលដែលបច្ចេកវិទ្យាអភិវឌ្ឍន៍យ៉ាងរហ័សកំពុងផ្លាស់ប្តូរឧស្សាហកម្មទេសចរណ៍ បច្ចេកវិទ្យា AI កំពុងរៀបចំទម្រង់នៃរបៀបដែលអ្នកធ្វើដំណើររៀបចំផែនការ កក់ និងបទពិសោធន៍នៃការធ្វើដំណើរ។ ចាប់ពីជំនួយការដែលដំណើរការដោយ AI រហូតដល់តារាងធ្វើដំណើរផ្ទាល់ខ្លួន ឆ្នាំ ២០២៥ សម្គាល់នូវការបោះជំហានទៅមុខដ៏សំខាន់មួយទៅកាន់អនាគតនៃការធ្វើដំណើរតាមបែបបច្ចេកវិទ្យាខ្ពស់។

 

រូបថត៖ duongduykhangnb

• ការសម្រាកលំហែក្នុងអាកាសធាតុត្រជាក់ (Coolcations)៖ ការសម្រាកលំហែក្នុងអាកាសធាតុត្រជាក់ជាងមុន។ ខណៈពេលដែលតំបន់ក្តៅបែបប្រពៃណីកាន់តែក្តៅឡើង អ្នកធ្វើដំណើរកំពុងផ្លាស់ប្តូរទៅរកការសម្រាកលំហែបែប “coolcations” ដែលមានសីតុណ្ហភាពត្រជាក់ជាង។ “Coolcations” - ការឈប់សម្រាកទៅកាន់តំបន់ដែលមានអាកាសធាតុត្រជាក់ជាងមុនក្នុងអំឡុងខែដែលធ្លាប់តែក្តៅ - បានលេចឡើងជាចលនាដ៏សំខាន់មួយក្នុងឆ្នាំ ២០២៤ ហើយត្រូវបានរំពឹងថានឹងបន្តនៅក្នុងឆ្នាំ ២០២៥។ និន្នាការនេះជម្រុញឱ្យអ្នកធ្វើដំណើរស្វែងរកការសម្រាកលំហែនៅតំបន់ខ្ពង់រាប និងតំបន់រយៈទទឹងខ្ពស់ ដោយប្តូរពីឆ្នេរខ្សាច់ដែលមានពន្លឺថ្ងៃខ្លាំង ទៅជាតំបន់ភ្នំ និងរមណីយដ្ឋានបឹងវិញ។

• ការធ្វើដំណើរប្រកបដោយគោលបំណង៖ ការបន្សល់ទុកលើសពីការចងចាំ។ នៅពេលដែលការយល់ដឹងជាសកលអំពីបញ្ហាបរិស្ថាន និងសង្គមកើនឡើង អ្នកធ្វើដំណើរស្វែងរកអ្វីដែលលើសពីគោលដៅទេសចរណ៍ដ៏ស្រស់ស្អាត - ពួកគេចង់ចូលរួមចំណែកយ៉ាងសកម្មក្នុងការស្តារឡើងវិញនូវទីតាំងដែលពួកគេបានទៅទស្សនា

 

រូបថត៖ hoianphotoguide

• ការគេចចេញពីភាពមមាញឹកតាមបែបទេសភាពធម្មជាតិ៖ ការស្វែងរកឡើងវិញនូវការធ្វើដំណើរយឺតៗតាមផ្លូវរថភ្លើង។ នៅពេលដែលអ្នកធ្វើដំណើរស្វែងរកជម្រើសដែលមិនប៉ះពាល់ដល់បរិស្ថានជំនួសឱ្យការហោះហើរ ការធ្វើដំណើរតាមរថភ្លើងកំពុងទទួលបានការពេញនិយមឡើងវិញ។ ការផ្លាស់ប្តូរនេះបង្ហាញថារថភ្លើងមិនមែនគ្រាន់តែជាមធ្យោបាយដឹកជញ្ជូនប៉ុណ្ណោះទេ ប៉ុន្តែពួកគេផ្តល់ជូននូវផ្លូវដែលមានទេសភាពស្រស់ស្អាត បង្អួចបែប panoramic ទូរថភ្លើងសម្រាប់គេង និងបទពិសោធន៍ទទួលទានអាហារ ដែលបំប្លែងការធ្វើដំណើរទៅជាផ្នែកមួយដ៏សំខាន់នៃការផ្សងព្រេង។

• ការធ្វើដំណើរបែបលំហអាកាស៖ ការទស្សនាផ្កាយ។ ទេសចរណ៍តារាសាស្ត្រ (Astro-tourism) កំពុងមានការកើនឡើង ដោយផ្តល់ឱ្យអ្នកធ្វើដំណើរនូវការផ្សារភ្ជាប់ទៅនឹងលំហអាកាស តាមរយៈការធ្វើដំណើរទៅកាន់គោលដៅដែលមានការបំពុលដោយពន្លឺតិចតួចបំផុត ដើម្បីសង្កេតមើលបាតុភូតលើមេឃ

អនាគតនៃការធ្វើដំណើរមើលទៅហាក់ដូចជាភ្លឺស្វាង និងគួរឱ្យរំភើបណាស់!