ខេត្ត Thai Binh មិនសូវជាល្បីល្បាញជាគោលដៅទេសចរណ៍តំបន់ឆ្នេរនោះទេ ប៉ុន្តែមានឆ្នេរដ៏ស្ងប់ស្ងាត់មួយនៅក្នុងខេត្ត Thai Binh ដែលកំពុងទាក់ទាញចំណាប់អារម្មណ៍របស់ភ្ញៀវទេសចរជាបណ្តើរៗ។ ឆ្នេរ Quang Lang ទទួលបានការពេញចិត្តពីសំណាក់ភ្ញៀវទេសចរក្នុងស្រុក ហើយបានក្លាយជាកន្លែងសំណព្វចិត្តរបស់ពួកគេក្នុងអំឡុងពេលថ្ងៃឈប់សម្រាកបុណ្យជាតិ។

ឆ្នេរ Quang Lang ស្ថិតនៅក្នុងឃុំ Thuy Hai ស្រុក Thai Thuy ខេត្ត Thai Binh មានចម្ងាយប្រហែល ១២០ គីឡូម៉ែត្រពីទីក្រុងហាណូយ។

Quang Lang លេចធ្លោក្នុងចំណោមឆ្នេរដ៏ទាក់ទាញ និងល្បីល្បាញនៅក្នុងប្រទេសវៀតណាម។ «រតនសម្បត្តិលាក់ខ្លួន» មួយនេះ មានឆ្នេរខ្សាច់រាបស្មើពណ៌ត្នោត លាតសន្ធឹងដូចជាកញ្ចក់ដ៏ធំសម្បើម ឥតព្រំដែនរហូតដល់ជើងមេឃ។ ក្រឡេកមើលទៅក្នុងកញ្ចក់នេះ ភ្ញៀវទេសចរអាចមើលឃើញការឆ្លុះបញ្ចាំងដ៏ស្រស់ស្អាតនៃទេសភាពសមុទ្រ និងផ្ទៃមេឃ។ ទាំងអស់នេះបង្កើតបានជាភាពទាក់ទាញដ៏ស្រស់បំព្រង និងភាពស្ងប់ស្ងាត់ដ៏អស្ចារ្យ។ Quang Lang ពិតជាស័ក្តិសមបំផុតសម្រាប់និន្នាការ «គេចចេញពីភាពអ៊ូអរ» នាពេលបច្ចុប្បន្ន ដោយសារតែភាពស្ងប់ស្ងាត់ និងទេសភាពដ៏មានសន្តិភាពរបស់វា។

របៀបធ្វើដំណើរទៅទីនោះ

ភ្ញៀវទេសចរអាចធ្វើដំណើរទៅកាន់ Quang Lang ដោយរថយន្ត ឬម៉ូតូ។ ឬក៏ភ្ញៀវទេសចរអាចជិះរថយន្តក្រុងបានយ៉ាងងាយស្រួល ប្រសិនបើមានអារម្មណ៍ថាខ្ជិលបើកបរ។ ពេលមកដល់ Thai Binh ភ្ញៀវទេសចរអាចជួលម៉ូតូដើម្បីជិះទៅកាន់ឆ្នេរសមុទ្រ។ ទោះជាយ៉ាងណាក៏ដោយ បទពិសោធន៍ដ៏អស្ចារ្យក្នុងការទស្សនាអ្វីដែលគេហៅថា «មហាសមុទ្រគ្មានទីបញ្ចប់» នេះ គឺសម្រាប់តែអ្នកដែលភ្ញាក់ពីព្រលឹមប៉ុណ្ណោះ។

ពេលវេលាល្អបំផុតដើម្បីទស្សនា Quang Lang

ពេលវេលា និងអាកាសធាតុ គឺជាកត្តាសំខាន់បំផុតដែលបង្កើតឥទ្ធិពល «គ្មានទីបញ្ចប់» នេះ។ ការធ្វើដំណើរនៅចន្លោះខែមិថុនា និងខែតុលា ជារៀងរាល់ឆ្នាំ គឺជាអាកាសធាតុល្អបំផុតដើម្បីមើលឃើញបាតុភូតនេះ នៅក្រោមមេឃស្រឡះ គ្មានខ្យល់ និងមានពពកតិចតួច។

ដើម្បីមើលឃើញឆ្នេរនេះនៅក្នុងស្ថានភាពដ៏ស្រស់ស្អាតបំផុត អ្នកត្រូវធ្វើដំណើរនៅម៉ោង ៤ ព្រឹក និងដើរចម្ងាយប្រហែល ៣ ទៅ ៥ គីឡូម៉ែត្រកាត់តាមព្រៃកោងកាង ដែលនេះអាចជាការប្រឈមសម្រាប់ភ្ញៀវទេសចរមួយចំនួន ប៉ុន្តែបើគ្មានការប្រឹងប្រែង ក៏គ្មានលទ្ធផលដែរ (no pain, no gain) ដើម្បីរីករាយជាមួយបរិយាកាសដ៏ស្ងប់ស្ងាត់ និងពន្លឺព្រិលៗ ដែលសំឡេងតែមួយគត់ដែលអ្នកឮ គឺសំឡេងខ្សាច់ដែលត្រូវជើងរបស់អ្នកជាន់សង្កត់។ ភក់អាចនឹងរអិល និងទន់ ដូច្នេះត្រូវត្រៀមខ្លួនឱ្យរួចរាល់ អ្នកអាចពាក់ស្បែកជើងកវែងដើម្បីកុំឱ្យទទឹក ប៉ុន្តែការណែនាំនៅទីនេះ គឺការដើរដោយជើងទទេដើម្បីទទួលបានអារម្មណ៍ពិតៗ។

នៅពេលទៅដល់ អ្នកអាចមើលឃើញរូបរាងព្រិលៗរបស់អ្នកនេសាទ និងឮសំឡេងជជែកគ្នា និងសើចសប្បាយតិចៗពីចម្ងាយ។ ក្រឡេកមើលជុំវិញខ្លួន បើកភ្នែកឱ្យធំទូលាយ ផ្ទៃទឹកចាំងពន្លឺដូចជាកញ្ចក់ ខ្យល់អាកាសបរិសុទ្ធ និងទទួលអារម្មណ៍ពីខ្យល់បក់បោកខ្លាំង។

នៅពេលដែលជើងមេឃទិសខាងកើតចាប់ផ្តើមបើក ពន្លឺព្រះអាទិត្យដំបូងបង្អស់បានបញ្ចេញពណ៌ទឹកក្រូច និងពណ៌ក្រហមស្រាលៗ ហើយកាន់តែភ្លឺឡើងៗទៅតាមនាទីនីមួយៗដែលកន្លងផុតទៅ។ នៅក្នុងស្ថានភាពនេះ អ្នកអាចមើលឃើញ Quang Lang ក្នុងស្រមោលពណ៌ខុសៗគ្នា ហើយអ្នកនឹងមានអារម្មណ៍ដូចជា Alice នៅក្នុងពិភពអច្ឆរិយៈ (Alice in Wonderland) ដែរ។ នៅពេលដែលព្រះអាទិត្យមិនទាន់រះឡើងផុតពីផ្ទៃសមុទ្រ វានឹងចាំងពន្លឺទៅលើពពក ធ្វើឱ្យពួកវាភ្លឺចែងចាំងក្នុងទិដ្ឋភាពដ៏ស្រស់ស្អាតដែលមានពណ៌ចម្រុះ ដូចជាពណ៌ផ្កាឈូក ក្រហម ឬស្វាយ។ ទេសភាពដ៏ស្ងប់ស្ងាត់ និងទាក់ទាញនេះប្រែក្លាយ Quang Lang ទៅជាពិភពពីរផ្សេងគ្នា។ សមុទ្រដ៏ស្ងប់ស្ងាត់គឺប្រៀបដូចជាកញ្ចក់ដ៏ធំសម្បើមដែលលាតសន្ធឹងគ្មានទីបញ្ចប់ ហាក់ដូចជាផ្ទៃមេឃបានជួបនឹងផែនដីអញ្ចឹង។

ទិដ្ឋភាពដ៏អស្ចារ្យនឹងត្រូវបានបង្ហាញឱ្យឃើញយ៉ាងច្បាស់នៅពេលដែលពន្លឺថ្ងៃរះពេញលេញ ដោយបំភ្លឺពេញលំហអាកាសទាំងអស់។ នៅខណៈពេលនេះ ភ្ញៀវទេសចរនឹងមានអារម្មណ៍រំភើបរីករាយយ៉ាងខ្លាំងដោយបានឈរនៅលើឆ្នេរខ្សាច់ដ៏រាបស្មើដែលលាតសន្ធឹងរាប់សិបគីឡូម៉ែត្រ។

សមុទ្រដ៏ធំល្វឹងល្វើយលេចឡើងយ៉ាងច្បាស់ និងស្រស់ស្អាតនៅចំពោះមុខភ្នែក។ នៅពេលព្រះអាទិត្យកំពុងរះ ពពកពណ៌មាសចាប់ផ្តើមប្រែជាពណ៌ស ហើយមេឃប្រែជាពណ៌ខៀវស្រឡះ។ ការផ្លាស់ប្តូរសីតុណ្ហភាពនាំមកនូវខ្យល់បក់ត្រជាក់ស្រាលៗ។ នៅថ្ងៃដែលមេឃស្រឡះ ជើងមេឃហាក់ដូចជាខិតទៅឆ្ងាយរាប់សិបគីឡូម៉ែត្របន្ថែមទៀត។

Quang Lang ក្នុងថ្ងៃដំបូងនៃរដូវក្តៅមានភាពកក់ក្តៅជាមួយនឹងពណ៌ដ៏រស់រវើកនៅលើពពក។ វាក៏ជាពេលវេលាដ៏ល្អឥតខ្ចោះក្នុងការថតរូបដ៏ស្រស់ស្អាតនៃសមុទ្រគ្មានព្រំដែន និងដើម្បីបំពេញបំណងប្រាថ្នាចង់ឃើញភាពអស្ចារ្យដោយការគយគន់ពេលវេលាដ៏ទាក់ទាញនេះ។

នៅពេលរដូវស្លឹកឈើជ្រុះមកដល់ ទេសភាពគ្មានព្រំដែនហាក់ដូចជារួញតូចទៅៗ ដូចជាត្រូវបានគេដាក់ចូលទៅក្នុងប្រអប់ Pandora។ បរិយាកាសត្រូវបានគ្របដណ្តប់ដោយអ័ព្ទដែលមានពណ៌លឿង ផ្កាឈូក និងស្វាយស្រាលៗ បង្កើតបានជាបរិយាកាសដ៏កក់ក្តៅ និងរ៉ូមែនទិក។

សូមចូលរួមជាមួយ vietnam.travel និងគយគន់ផ្ទៃទឹកគ្មានទីបញ្ចប់នៃឆ្នេរ Quang Lang!