នៅប្រទេសវៀតណាម ពាក្យ «Phu Quoc» គឺតំណាងឱ្យឆ្នេរខ្សាច់ចែងចាំង ពិធីជប់លៀងគ្រឿងសមុទ្រ និងទិដ្ឋភាពថ្ងៃលិចពណ៌ស្វាយក្រម៉ៅ។ កោះភូកុក (Phu Quoc) និងប្រជុំកោះ អានថើយ (An Thới) ទាក់ទាញភ្ញៀវទេសចរគ្រប់ប្រភេទ ចាប់តាំងពីអ្នកស្វែងរកភាពប្រណីត មាតាបិតាវ័យក្មេង រហូតដល់ក្រុមមិត្តភក្តិជានិស្សិត។ ទោះបីជាទទួលបានការពេញនិយមក៏ដោយ ក៏កោះនេះនៅតែរក្សាបាននូវភាពទាក់ទាញពីធម្មជាតិដើមរបស់ខ្លួនយ៉ាងច្រើនដដែល។ ចាប់ពីព្រៃការពាររហូតដល់វត្តអារាមលាក់ខ្លួន ជីវិតសត្វសមុទ្ររហូតដល់កសិដ្ឋានម្រេច មានអ្វីៗជាច្រើនដែលត្រូវស្វែងរកនៅទីនេះ។ ប្រសិនបើអ្នកចូលចិត្តស្វែងយល់អំពីវប្បធម៌ក្នុងតំបន់ និងចង់នៅជិតស្និទ្ធនឹងធម្មជាតិ មគ្គុទេសក៍ទេសចរណ៍ទៅកាន់កោះភូកុកនេះគឺសម្រាប់អ្នក។

---

ដើមឈើ និងផ្លូវដើរព្រៃ

សួស្តីធម្មជាតិ។ ភាគខាងជើងនៃកោះនេះត្រូវបានគ្របដណ្តប់ដោយព្រៃឈើ និង ឧទ្យានជាតិភូកុក (Phu Quoc National Park)។ តំបន់ការពារចំនួនបួន រួមមាន បាយថម (Bai Thom) គូដួង (Cua Duong) ហាមនីញ (Ham Ninh) និង ហ្គាញ់ដាវ (Ganh Dau) គឺបើកសម្រាប់បោះជំរំ ការមើលសត្វស្លាប និងការដើរព្រៃ។ កន្លែងនីមួយៗមានផ្លូវលំ និងផ្លូវដីដែលអ្នកអាចរុករកដោយជិះកង់ ឬដើរដោយថ្មើរជើង។ អាកាសធាតុក្តៅឧណ្ហៗ និងភូមិសាស្ត្រដាច់ដោយឡែករបស់កោះនេះ បង្កើតបានជាប្រភេទរុក្ខជាតិចម្រុះ៖ អ្នកនឹងសង្កេតឃើញនូវទេសភាពព្រៃត្នោត វាលស្មៅ និងព្រៃកោងកាង។

សម្រាប់ការដើរព្រៃនៅលើផ្លូវរាបស្មើរកាត់ដើមឈើយក្ស ផ្លូវលំហ្គាញ់ដាវ (Ganh Dau trail) គឺមានការពេញនិយមបំផុត ដោយសារតែមានដើមឈើបុរាណៗដ៏ស្រស់ស្អាតសម្រាប់ថតរូប។ ការដើរលំហែបែបស្រាលៗមួយបែបទៀត នឹងនាំអ្នកទៅកាន់ ទឹកធ្លាក់ស៊ូយត្រាញ់ (Suoi Tranh waterfall) ដែលអ្នកអាចចុះលេងទឹកដ៏ត្រជាក់កាយ។ សម្រាប់អ្នកដើរព្រៃដែលមានបទពិសោធន៍ច្រើន ដែលចង់ស្វែងរកចំណុចមើលទេសភាពមហាសមុទ្រដ៏ស្រស់ស្អាត អាចសាកល្បងដើរតាម ផ្លូវឡើងភ្នំហាមនីញ (Ham Ninh mountain trail)។

គន្លឹះ៖ ប្រសិនបើអ្នកកំពុងស្វែងរកកន្លែងស្នាក់នៅបែបធម្មជាតិ ផ្ទះស្នាក់ The River Mouth Phu Quoc មានផ្តល់ជូនបឹងហ្គាឡូសសរខ្ពស់នៅលើទឹក ហើយ Sen Lodge ផ្តល់ជូនភ្ញៀវនូវផ្ទះនៅលើដើមឈើផ្ទាល់ខ្លួន។

---

ក្រោមបាតសមុទ្រ និងនៅលើវាលខ្សាច់

តំបន់បម្រុងជីវមណ្ឌលគៀនយ៉ាង (Kien Giang Biosphere Reserve) គឺជាតំបន់ការពារដោយអង្គការយូណេស្កូ (UNESCO) ហើយត្រូវបានចាត់ទុកថាជាកន្លែងដ៏ល្អបំផុតមួយសម្រាប់ជីវិតសត្វសមុទ្រនៅភាគខាងត្បូងប្រទេសវៀតណាម។ មានសកម្មភាពគួរឱ្យចាប់អារម្មណ៍ជាច្រើនសម្រាប់អ្នកទេសចរកម្សាន្តនៅជិតឆ្នេរខ្សាច់នៃឧទ្យានជាតិ ដូចជា សួនផ្កាថ្មហ្គាញ់ដាវ (Ganh Dau coral garden) សួនថ្មហាមនីញ (Ham Ninh rock garden) និងកោះនានានៃ ប្រជុំកោះអានថើយ (An Thới Archipelago)។ ទីតាំងទាំងនេះមានថ្មប៉ប្រះទឹកចម្រុះពណ៌នៅសមុទ្រសម្រាប់ការមុជទឹកមើលផ្កាថ្ម និងជាជម្រករបស់សត្វក្រោមទឹកជាច្រើនប្រភេទ។

នៅជិតភូមិរ៉ាច់វេម (Rach Vem) អ្នកនឹងឃើញឆ្នេរខ្សាច់សម៉ដ្ខខៃដែលគេប្រសិទ្ធនាមថា «ឆ្នេរផ្កាយសមុទ្រ (Starfish Beach)» ដែលជាកន្លែងអ្នកអាចមើលឃើញផ្កាយសមុទ្ររាប់មិនអស់នៅក្នុងទឹកពណ៌ខៀវថ្លាឆ្វង់។ អ្នកអាចហាលថ្ងៃ និងពិកនិកដោយសេរីនៅក្រោមចង្កោមដើមដូងដែលដុះតម្រៀបគ្នាតាមបណ្តោយឆ្នេរ។ ក្នុងអំឡុងពេលដ៏ត្រឹមត្រូវនៃឆ្នាំ អ្នកថែមទាំងអាចមើលឃើញប្លង់តុងបញ្ចេញពន្លឺ (bioluminescent plankton) នៅក្នុងផ្នែករាក់ៗនៃឆ្នេរផ្កាយសមុទ្រ (Starfish Beach) និងតាមបណ្តោយភាគខាងត្បូងនៃ ឡុងប៊ិច (Long Beach) ឬភាគខាងជើងនៃ ឆ្នេរដាតដូ (Dat Do Beach)។

---

កសិដ្ឋានអេកូឡូស៊ី និងរោងចក្រទឹកត្រី

ជាច្រើនជំនាន់មកហើយ កសិករនៅកោះភូកុកបានទាញយកផលប្រយោជន៍ពីដីមានជីជាតិ និងអាកាសធាតុនៃកោះរបស់ពួកគេ ដើម្បីដាំដំណាំដែលមានគុណភាពខ្ពស់ ជាពិសេសគឺគ្រាប់ម្រេចដែលមានក្លិនក្រអូប និងហឹរ។ អ្នកអាចដើរកម្សាន្តនៅកសិដ្ឋានម្រេចទាំងនេះ ដើម្បីស្វែងយល់អំពីដំណើរការផលិត និងទិញគ្រឿងផ្សំដ៏ល្អៗត្រឡប់ទៅផ្ទះសម្រាប់ចម្អិនអាហារ។ ការចិញ្ចឹមឃ្មុំយកទឹកឃ្មុំ គឺជាមុខរបរកសិកម្មដ៏ពេញនិយមមួយផ្សេងទៀតក្នុងចំណោមកសិករនៅភូកុក ហើយ កសិដ្ឋានចិញ្ចឹមឃ្មុំភូកុក (Phu Quoc Bee Farm) គឺជាចំណតដ៏ល្អបំផុតក្នុងការធ្វើដំណើរជុំវិញកោះ។ ភ្លក្សរសជាតិកាហ្វេទឹកឃ្មុំដ៏ឈ្ងុយឆ្ងាញ់ និងបង្អែមប្លែកៗ រួចទស្សនាបរិវេណកសិដ្ឋានដើម្បីស្វែងយល់បន្ថែមអំពីការចិញ្ចឹមឃ្មុំប្រកបដោយនិរន្តរភាព។

ប្រសិនបើមានរឿងមួយដែលត្រូវបានគេផ្សារភ្ជាប់បំផុតទៅនឹងកោះភូកុក នោះគឺទឹកត្រី។ កោះនេះមានប្រពៃណីជាយូរលង់ណាស់មកហើយក្នុងការផលិតទឹកត្រីលំដាប់ថ្នាក់ខ្ពស់ ដែលត្រូវបានប្រើប្រាស់មិនត្រឹមតែនៅក្នុងប្រទេសវៀតណាមប៉ុណ្ណោះទេ ប៉ុន្តែថែមទាំងនៅជុំវិញពិភពលោកផងដែរ។ ប្រសិនបើអ្នកចាប់អារម្មណ៍លើដំណើរការនេះ ចាប់តាំងពីការនេសាទត្រីកំសតរហូតដល់ការច្រកចូលដប សូមសាកល្បងដើរទស្សនា រោងចក្រទឹកត្រីទូកក្រហម (Red Boat Fish Sauce factory) ដែលមានទីតាំងនៅក្នុងសួនមាត់ទន្លេដ៏ស្រស់ស្អាត ដើម្បីស្វែងយល់បន្ថែមអំពីគ្រឿងទេសវៀតណាមដ៏ល្បីល្បាញនេះ។

---

ភូមិនេសាទ

វាមិនមែនជាការសម្រាកលំហែកាយនៅកោះភូកុកនោះទេ ប្រសិនបើគ្មានការទទួលទានអាហារពេលល្ងាចនៅ ផ្សារគ្រឿងសមុទ្រដួងដុង (Dương Đông seafood market) ដែលផលនេសាទប្រចាំថ្ងៃត្រូវបានយកទៅអាំង ស្ងោរ ចំហុយ និងឆាជាមុខម្ហូបដ៏ឈ្ងុយឆ្ងាញ់រាប់មិនអស់។ ទោះជាយ៉ាងណាក៏ដោយ នៅពេលថ្ងៃ អ្នកប្រហែលជាចង់ទៅទស្សនាភូមិនេសាទមួយក្នុងចំណោមភូមិនេសាទជាច្រើននៅលើកោះ ដើម្បីមើលឃើញជីវភាពរស់នៅប្រចាំថ្ងៃយ៉ាងជិតស្និទ្ធ។ ភូមិនេសាទដែលងាយស្រួលធ្វើដំណើរតាមទូកទៅដល់ រួមមាន គួកាន (Cua Can) រ៉ាច់ត្រាំ (Rach Tram) និង ហាមនីញ (Ham Ninh)។ ផែទូកនៅទីនេះគឺពោរពេញទៅដោយទូកលាបពណ៌ស្រស់ឆើតឆាយ ដែលនឹងធ្វើឱ្យអ្នកមានអារម្មណ៍ដូចជាកំពុងស្ថិតនៅក្នុងកាតប៉ុស្តាល់នៃកោះភូកុកអញ្ចឹង។

គន្លឹះ៖ ទីតាំងសាសនានៅភូកុកផ្តល់នូវការយល់ដឹងកាន់តែស៊ីជម្រៅអំពីជីវិតនៅលើកោះ។ វត្ត Dinh Cau ដ៏ស្រស់ឆើតឆាយ គឺជាកន្លែងដែលអ្នកបើកទូក និងអ្នកនេសាទទៅបន់ស្រន់សុំសេចក្តីសុខពីព្រះម៉ែគង់គារ មុនពេលពួកគេចេញពីច្រាំង ហើយ វត្ត Sung Hung មានគំនូរលើជញ្ជាំងដ៏គួរឱ្យចាប់អារម្មណ៍ពីពុទ្ធប្រវត្តិ។

ជាមួយនឹងគ្រឿងសមុទ្រដ៏សម្បូរបែប ចុងភៅនៅភូកុកបានបង្កើតរូបមន្តធ្វើម្ហូបរាប់មិនអស់ ដើម្បីបង្ហាញពីគ្រឿងផ្សំដ៏លេចធ្លោរបស់ពួកគេ។ ឈប់នៅតូបលក់ bún kèn ក្នុងអំឡុងពេលដំណើរកម្សាន្តរបស់អ្នក ដើម្បីសាកល្បងមុខម្ហូបគុយទាវដ៏ប្លែកដែលមានប្រភពមកពីកម្ពុជា ជាមួយនឹងទឹកស៊ុបធ្វើពីត្រីងៀត ខ្ទិះដូង និងម្សៅការីបន្តិច។ សម្រាប់អាហារថ្ងៃត្រង់ ឬអាហារពេលល្ងាចនៅក្បែរទឹក សូមកុម្ម៉ង់ cá sòng nướng (ត្រី Trachurus អាំង) ឬ gỏi cá trích (ញាំត្រី herring ឆៅ)។ រីករាយជាមួយគ្រែងចំពុះទាអាំង និងប្រម៉ាទឹក (echinus) ញ៉ាំជាមួយខ្ទឹមក្រហមបំពង សណ្តែកដី និងស្លឹកខ្ទឹម។ មិនថាអ្នកជ្រើសរើសមុខម្ហូបគ្រឿងសមុទ្រណាមួយនោះទេ អ្នកនឹងដឹងថាវាពិតជាស្រស់ៗជាក់ជាមិនខាន!

---

ចង់បានគំនិតធ្វើដំណើរទៅវៀតណាមបន្ថែមទៀតទេ? ចុះឈ្មោះសម្រាប់ព្រឹត្តិបត្រព័ត៌មានរបស់យើង ដើម្បីទទួលបានរឿងរ៉ាវល្អៗបំផុតរបស់យើងនៅក្នុងប្រអប់សំបុត្ររបស់អ្នក។